فلسطينيات مبعثرة

أعتذر للغة الفصحى،وأستميحها عذراً من خلال الكتابة بأغلب اللكنات الفلسطينية العامة،يحق لي يا فصحى بيوم النكبة أن أخرج من كلامي الموميائي...

ونصي هذا محض خرابيش لا تندرج تحت البوح أو ما يسمى بالإبداع، انما هي اختناق كلمات لا ريب

فلسطينيات مبعثرة
*
تعال يا روح ستك واقعد على جفوني
تعال أحكيلك عن أيام الطفولي
عن الهروب يا ستي من يوم
عرسي،
من دراي،من ترابي،من عبق شرفي.
حكوا كثير قبلي يا حبيبي
بس أنا،وآآآآآآآاه من انا
كلامي قليل ومجبول بالعنى.
كنت طفلة لسى خارطة وجهي وتقاسيمي خضرا
على رموشي نامت طبريا
وفوق خدودي غنت حيفا
كنت ألعب يا ستي بصفد وأروح على عكا،
تعرف يا عين ستك أنا بّذكر طريق دارنا
مليح؛
هناك عند الحاكورة،جنب البستان الأزرق
عند بيت أبو محمد
عمي هذا يا ستي.
أبصر وين صارت دياره اسا يا روحي؟.
كنا صغار ونلعب بشَعر بعضنا
نرسم صورة لليل ونغرس فيها الشمس
وكان الوقت يمشي خايف من احلامنا،وعم يبكي.
والتراب براس الناقورة طعمه غير
حتىكلامه وسلامه غير.
والهوا وآآآآآآآآآآآآآآآآآآخ
من هبات الهوا لما تكون بجنين وتطّلع على سوا نابلس
كأنك يا ستي صرت بروحين
روح الك وروح كرمال الوطن
ولما صار الطوفان!!!!!!!!!!
أبوي حكالي:
بغدرش يابا،الموت فوق حجارنا
كراما
حكيتله،واللهي كأني لساني فيو هذاك الزمن؛
بحضن أبوي ببوس خدود امي،
وبغني
اوعا تحكي صوت ستك ما كان حلو
ما تضحك يا قلبي انه كانت ستك تغني وتغني
وتقول العتابا والميجنا
وترقص خصر رجال على كلمة أأأأأأووووووفففف
كنت اغني
لا كتب اسمك يا بلادي عا الشمس ال ما بتغيب
لامالي ولا ولادي على حبك ما في حبيب
وكانوا الجيران يجوا يلتموا عنا
ونعمل سامر صباّحي
وخيتي تقلي روحي نامي وأنا
أحكي لااااااااااااااااااا،ما بدي أنام
كان والله الي موقف وموقفي أقوى من كل زعامات العرب بخارجياتهم
خليني أمتع عيني بشوفة الخلان
خليني يا خيتا قبل ما نتهجر عن وطن الأوطان
تصدق ياعين ستك اني كتبت على صفحة السما
أنا أرضي وأرضي أنا.
وأدرس بطولكرم وأروح على مجدو
أرمِ شنتتي وألعب ببيسان ولما أزهق
أنزل على يافا،وأحكي لصحابي
زرتوا غزة يحكولي يلا، ما في ورانا شي خلينا نروح.
نتعب يا ستي ونروح نرتاح بالخليل نميّل على بيت لحم
ونسلم على أريحا ونبكي ياستيييييييي
ننننننببببببككككككي
ترا القدس من يوم يومها
كانت ولازالت
جريحةةةةةةةةةةةة
.
أنا يا وطن كنت أمشيك باليوم ملايين المرات فوق الأسر
وفوق جبين كل من كان اله صوت.
وكان الزمان يغرد قبل العصافير
مجانين انتوا؟
تعالوا نزور رام الله
إم عيون زينة الله تحوم حواليها وما شالله
إإإإإإإإإإإإإإإإإيه شو بدي أقول لأقول:
نسوانا كانت ولا بمليون رجال
ورجالنا كانوا أشاوس وجبال
وولادنا كانوا طيور على صدورالأهوال
وكلهم بحكوا وبرقصوا يا ستي على اغتصابنا
بفضوا ببكارات بعضهم بابتسامات
بناموا فوق صدر الكذب والاشاعات
وانا يا ستك
قلت للتاريخ تعال،،
حكيتله وانا ستك ترا نحنا أسود وأبطال
صحيح همي حكوا نكبة
بس النون شرف واستبسال
ولا الكاف محال وألف محال
والباء آآآه من مرارة الاستفحال
والتاء المسكرة يا ستي
ضاعت من شافت نذالة الأنذال
بضلوا يا ستي زعما وعرب وأجانب
وبنضل نحنا أسمى من الجبال
أنا
أنا
أنا
يا عيني صوت الحق تحت التراب،
أنا مو ستك أنا صرخة وطن لما يضيع بفتح باب
لضياع أشياء ما بعطيها غير الوطن
أنا صوت الفنن فوق خصر الصبايا
كلمة زمن بوقت ماله ثمن
رخيص لا بنشرى ولا بنباع